Колективот „Братството од дада“/„Brotherhood of Dada“ (B.o.D.) е обид за опредметување на идејата за колективен идентитет, чии членови непостојано создаваат уметнички производи (дела?) во неговите рамки. Кога велам „непостојано“, мислам на тоа дека производите на колективот речиси никогаш не се од соработки меѓу неговите членови, туку се од поединечни автори и од состави, чии алијаси или имиња се наведени на омотот/брошурата/проспектот/др. со кои производите на колективот би биле објавени/изложени.
Основач на колективот е пишувачот на ова четиво, кој за себеси вели дека се занимава со собирачка дејност и со семрежно архивирање/каталогизирање на собраните уметнички производи. Она што на членовите во колективот им е заедничко, за сега, не е ништо друго освен нивното малограѓанско место на живеење. Па, токму затоа што е такво, нема зошто делови од опусите (или целокупни) на нашите членови да не бидат достапни на семрежјето кога таму некој ќе наиде на името „Братството од дада“ („Brotherhood of Dada“). Неговиот колективен идентитет треба да се сфати како семрежен каталог на производи од сите уметности, каде сепак е именуван секој засебен производител (творец или состав творци), со што се нагласува второстепеното значење на личните идентитети на членовите.
Можностите што ни ги овозможува малограѓанството, избегнувајќи ги неволјите што тоа ни ги наметнува, треба да служат само како поттик за полнење на оваа архива уметнички производи и за спроведување уметнички настани зад кои ќе стои името на овој колектив. Единствените членови на сеопштата домашна културна сцена на кои им е забрането да го користат ова име се Драган Таневски, 2Бона и Македонската филхармонија.